அண்மைய பதிவுகள்
மேலதிக பதிவுகள்

பஸ்கா பண்டிகையில் இலங்கை ஜனாதிபதி மைத்திரி பால சிறிசேன !

இலங்கைக்கு ஆசீர்வாதம் அமைப்பு மற்றும் மட்டக்களப்பு போதகர் ஒன்றியம் மூன்று நாட்கள் (3,4 மற்றும் 5 ஆம் திகதிகளில்) ஏற்பாடு செய்த பஸ்கா பண்டிகை மற்றும் நற்செய்தி கூட்டம் கர்த்தருடைய கிருபையால் ஆசீர்வாதமாக மட்டகளப்பு நகரிலுள்ள இந்துக் கல்லூரி மைதானத்தில் நடைபெற்றது. இக்கூட்டத்தின் ஏற்பாட்டாளர் வண. ரோய் ஐசேக் அவர்கள் தேவ செய்தி வழங்கினார்.

இக்கூட்டத்தின் முக்கிய நிகழ்வாக அதிமேதகு இலங்கை ஜனாதிபதி மைத்திரி பால சிறிசேன அவர்கள் சனிக்கிழமை (4ஆம் திகதி) இடம்பெற்ற நிகழ்வில் கலந்து கொண்டார். ஜனாதிபதி அவர்களின் ஆசீர்வாதம் மற்றும் ஆட்சியமைப்பு போன்ற காரியங்களுக்காக விசேட ஜெபம் போதகர்கள் மற்றும் கலந்து கொண்ட விசுவாசிகளினால் ஏறெடுக்கப்பட்டது. அதன் பின்னர் இடம்பெற்ற ஜனாதிபதியின் உரையினை தொடர்ந்து அவருக்கு நினைவு சின்னங்கள்,  மட்டக்களப்பு போதகர் ஒன்றிய தலைவர் போதகர் குகன் இராஜதுரை அவர்களாலும் திருமதி. ரோய் ஐசேக் அவர்களாலும் வழங்கப்பட்டது. இந்நிகழ்வில் திருச்சபை போதகர்கள், மாகாண மற்றும் மத்திய அமைச்சர்கள், அரச அதிகாரிகள் போன்றோரும் கலந்து கொண்டனர். 

கர்த்தருக்கே மகிமை !!! 

உன் வெளிச்சத்தினிடத்துக்கு ஜாதிகளும், உதிக்கிற உன் ஒளியினிடத்துக்கு ராஜாக்களும் நடந்துவருவார்கள். [ஏசாயா 60:3]

இலங்கை போன்ற நாடுகளில் திருச்சபைகள் நடத்துகின்ற இவ்வாறன நிகழ்வுகளில் ஒரு நாட்டின் தலைவர் கலந்து கொள்வதென்பது மிகவும் கடினமான காரியம். ஆனால் இந்நாட்களில் கர்த்தர் எல்லாவற்றையும் மாற்றி வருகிறார். அதிசயங்களை காணப் பண்ணுகிறார். தொடர்ந்தும் இலங்கை தேசத்தின் இரட்சிப்புக்காக ஜெபிப்போம்.









இயேசுகிறிஸ்துவின் சிலுவை பாதையும் பாடுகளும் ....

அப்பொழுது அவரைச் சிலுவையில் அறையும்படிக்கு அவர்களிடத்தில் ஒப்புக்கொடுத்தான். அவர்கள் இயேசுவைப் பிடித்துக் கொண்டு போனார்கள். அவர் தம்முடைய சிலுவையைச் சுமந்துகொண்டு, எபிரெயு பாஷையிலே கொல்கொதா என்று சொல்லப்படும் கபாலஸ்தலம் என்கிற இடத்திற்குப் புறப்பட்டுப்போனார்கள். அங்கே அவரைச் சிலுவையில் அறைந்தார்கள்; அவரோடேகூட வேறிரண்டுபேரை இரண்டுபக்கங்களிலும் இயேசுவை நடுவிலுமாகச் சிலுவைகளில் அறைந்தார்கள். - (யோவான் 19:16-18)

பிரதான ஆசாரியனாகிய காய்பாவின் வீட்டிலிருந்து பிலாத்துவின் அரண்மனைக்கு கொண்டு செல்லப்பட்ட இயேசுகிறிஸ்து அங்கு நியாயம் விசாரிக்கப்படுகிறார். பிலாத்து அவரிடம் குற்றம் ஒன்றையும் காணாமல் அவரை விடுதலையாக்க தீர்மானித்த பொது யூதர்கள் அவரை சிலுவையில் அறைய சொல்லி சத்தமிட்டபடியால், அவரை சிலுவையில் அறையும்படிக்கு அவர்களிடத்தில் ஒப்புக்கொடுத்தான். எருசலேமில் இயேசு கிறிஸ்து சிலுவை சுமந்த பாதை 14 நிலையங்களாக பிரிக்கப்பட்டு இருக்கிறது. இது சிலுவை பாதை அல்லது Via Dolorosa என்றழைக்கப்படுகிறது.
 
1. பிலாத்து இயேசுவை சிலுவையில் அறைய ஒப்புக்கொடுத்தல். (யோவான்
19:16). இப்போது பிலாத்துவின் அரண்மனையில் அரபிய பெண்களுக்கு
பாடம் சொல்லி கொடுக்கும் இடமாக மாற்றப்பட்டுள்ளது. இங்கிருந்து
முதலாம நிலையம் ஆரம்பிக்கப்படுகிறது.
 
2. இயேசுவின் மேல் சிலுவை சுமத்தப்படுகிறது. இங்கு ரோம போர்ச்சேவகர்,அவரை வாரினால் அடிப்பித்து, முள்ளுகளினால் ஒரு முடியை உண்டு பண்ணி, அவர் சிரசின்மேல் வைத்து, விசப்பான அங்கியை உடுத்திய இடம் (யோவான் 19:1-2).
 
3. இயேசுகிறிஸ்து முதன் முறையாக சிலுவையின் பாரம் தாங்காமல் கீழே விழுகிறார்..
 
4. இயேசுகிறிஸ்துவின் தாயாகிய மரியாள் தன் மகன் சிலுவை சுமந்து
செல்வதை காண்கிற இடம். இதில் ஒரு சிறிய ஆலயத்தை
கட்டியிருக்கிறார்கள்.
 
5. சிரேனே ஊரானாகிய சீமோனை சிலுவையை சுமந்து கொண்டு வரும்படி அதை அவன் மேல் வைத்தார்கள் (லூக்கா 23:26)..
 
6. வெரோனிக்கா என்னும் சகோதரி இயேசுவின் முகத்தை தன்னிடம் இருந்த துணியால் துடைத்த இடம். அந்த துணியில் இயேசுவின் முகம்
பதிந்திருப்பதாக கூறப்படுகிறது..
 
7. இயேசுகிறிஸ்து இரண்டாம் முறையாக கீழே விழுகிறார்..
 
8. எருசலேமின் குமாரத்திகளே, நீங்கள் எனக்காக அழாமல்,
உங்களுக்காகவும், உங்கள் பிள்ளைகளுக்காகவும் அழுங்கள் என்று
இயேசுகிறிஸ்து சொன்ன இடம். (லூக்கா 23:27-31).
 
9. இயேசுகிறிஸ்து மூன்றாம் முறையாக கீழே விழுகிறார்.
மேற்கண்ட ஒன்பது நிலையங்களும் சந்தடி நிறைந்த பாலஸ்தீனியரின்
கடைவீதிகளுக்கு நடுவே இருக்கிறது..
 
10-14 நிலையங்கள் Holy Sepulchre என்னும் பெரிய ஆலயத்தின் உள்ளே
அமைந்துள்ளது..
 
10. இயேசுகிறிஸ்து உடுத்தியிருந்த துணி உரியப்படுகிறது.
 
11. இயேசுகிறிஸ்து சிலுவையில் ஆணிகளால் கடாவப்படுகிறார்..
 
12. இயேசுகிறிஸ்து சிலுவையில் தொங்கி மரிக்கிறார். இயேசுகிறிஸ்து
சிலுவையில் தொங்கி இருந்த கொல்கதா மலையின் பெரிய கற்பாறை ஒரு பெரிய கண்ணாடியில் மூடப்பட்டு பார்வைக்கு வைக்கப்பட்டிருக்கிறது. பக்கத்தில் இயேசுகிறிஸ்துவின் தாயார் மரியாளின் இருதயத்தை ஒரு பட்டயம் ஊடுருவி இருப்பதைப் போன்று சிலையில் வடிக்கப்பட்டிருக்கிறது. இயேசுகிறிஸ்து சிலுவையில் தொங்குவதை போன்று பிரத்யேகமாக செய்திருக்கிறார்கள்..
 
13. இயேசுவின் சரீரம் சிலுவையிலிருந்து இறக்கப்படுகிறது. யோசேப்பு
அந்த சரீரத்தை பிலாத்துவினிடத்தில் கேட்டு பெற்று கொள்கிறான்
(யோவான் 19:38). இவை அங்கு படங்களாக சித்திரிக்கப்பட்டுள்ளன. அந்த படத்தில் சிறு சிறு தூதர்களும் தங்கள் கண்களை ஒரு துணியால்
துடைத்தபடி பறந்து செல்லும் காட்சி மனதை உருக்க வைக்கும். அங்கு
பக்கத்திலேயே நிக்கோதேமு வெள்ளைப்போளமும் கரிய போளமும் கலந்து, இயேசுகிறிஸ்துவின் சரீரத்தை சுகந்த வர்க்கங்களுடனே சீலைகளில் சுற்றி கட்டின இடம் உள்ளது (யோவான் 19:40).
 
14. இயேசுகிறிஸ்துவின் சரீரம் ஒரு புதிய கல்லறையில் வைக்கப்படுகிறது. -
(யோவான் 19:41)..
 
இந்த 14 நிலையங்களையும் ஒவ்வொரு வெள்ளிக்கிழமைகளிலும் மதியம் மூன்று மணிக்கு Franciscans எனப்படும் கிறிஸ்தவர்கள் ஊர்வலமாக வருகிறார்கள். இயேசுகிறிஸ்து கூறின ஏழு வார்த்தைகளும் இந்த 14 நிலையங்களில் அடங்கி விடுகிறது. இந்த சிலுவை பாதை சரியானது அல்ல, மற்ற ஒரு பாதை உண்டு என்றும் கூறப்படுகிறது. எது எப்படியாயிருந்தாலும், இயேசுகிறிஸ்து சிலுவையை சுமந்து சென்றது உண்மை, அவர் கொல்கதா மலையில் சிலுவையில் அறையப்பட்டது உண்மை, அவருடைய பாடுகள் அத்தனையும் உண்மை!
 
தம் ஜீவனை அந்த கொடிய குரிசில் பிதாவினிடம் அர்ப்பணித்து மரித்ததும் உண்மை, அப்படியே மூன்றாம் உயிரோடெழுந்ததும் உண்மை! ஆமென் அல்லேலூயா!..

சகோ. மோகன் சி லாசரஸ் அவர்களைப் பற்றி...

இயேசு விடுவிக்கிறார் ஊழியத்தின் ஸ்தாபகர் சகோ. மோகன் சி லாசரஸ் அவர்களைப் பற்றி...

தமிழகத்தின் தென் மாவட்டங்களில் ஒன்றான தூத்துக்குடி மாவட்டத்திலுள்ள நாலுமாவடி என்னும் அழகிய கிராமத்தில் பக்தி வைராக்கியமுள்ள இந்துக் குடும்பத்தில் பிறந்தவர்தான் நம் அன்பு சகோதரர் மோகன் சி. லாசரஸ் அவர்கள். சிறுவயதிலேயே தனது பாட்டியின் மூலம் இராமாயாணம், மகாபாரதம் போன்ற புராணக் கதைகளை அதிகமதிகமாய் கேட்டறிந்தபடியால் தெய்வத்தின் மீதும், தான் சார்ந்திருந்த மதத்தின் மீதும் அளவற்ற பக்திவைராக்கியம் எற்பட்டது. இயேசுவை
க் குறித்து அறிவித்தபொழுது அவர் தெய்வமல்ல என்று வாதாடியதோடு மாத்திரமல்ல அவரைக் குறித்து எவ்வளவு கேவலமாக பேசமுடியுமோ அவ்வளவு கேவலமாக பேசிய அவரைதான் அன்புள்ள நேசர் இயேசு தேடிவந்து தனக்கென்று வல்லமையுள்ள சாட்சியாக நிறுத்த சித்தம்கொண்டார்.


அற்புதம்

1968ம் ஆண்டு சகோதரருடைய 14வது வயதில் ஒரு கொடிய வியாதி அவருடைய வலது காலைத் தாக்கிற்று. எத்தனையோ சிறப்பு மருத்துவர்களிடம் கொண்டு சென்று காண்பித்த பொழுதும் என்னவியாதியென்றே கண்டு பிடிக்க முடியவில்லை. வலது கால் முற்றிலும் செயலிழந்துவிட்டது. இருதயமும் வீங்கியது, எலும்பும் தோலுமாய் மரணப் படுக்கைக்குள்ளானார்கள். மருத்துவர்கள் கைவிட்டார்கள். வேண்டிய தெய்வங்களாலும் ஒன்றும் செய்ய முடியவில்லை. இந்நேரத்தில்தான் இயேசு தேடி வந்தார். குடும்ப நண்பராகிய ஒரு கர்த்தருடைய பிள்ளை சகோதரரை பார்க்க வந்தபொழுது அவரிடம் சகோதரின் தாயார் என் மகனை எல்லோரும் கைவிட்டுவிட்டார்கள். நீ என் மகனுக்காக இயேசுவிடம் வேண்டுதல் செய்வாயா. . . . என்று கேட்டார். உடனே அவர் சகோதரரின் படுக்கை அருகில் முழங்கால்படியிட்டு ஜெபிக்க ஆரம்பித்த அந்த நேரத்தில்தானே அதிசயம் நிகழ்ந்தது திடீரென்று ஒரு தேவ வல்லமை சகோதரரின் சரீரத்தில் இறங்கியது. கால்களை அசைக்க முடியாதபடி படுத்திருந்த சகோதரன் நொடிப்பொழுதில் குணமாகி படுக்கையில் எழுந்து அமர்ந்துவிட்டார். அப்பொழுதுதான் இயேசுகிறிஸ்துவே மெய்யான தேவன் என்பதை அறிந்து கொண்டார்.

இரட்சிப்பு

இயேசு தன்னை சுகமாக்கிவிட்டார் என்ற மகிழ்ச்சியில் சென்னை பாடி CSI ஆலய ஆராதனைக்கு சென்றாலும், வேதம் வாசித்து பக்தியோடிருந்தாலும் வாழ்க்கை மாறவில்லை. 1972 ஆண்டு மார்ச் மாதம் 17ம் தேதி இரவில் இயேசு என்னோடு பேசவேண்டும் என் பாவங்களை மன்னிக்க வேண்டும், அதுவரை என் முழங்காலைவிட்டு எழுந்திருப்பதில்லை என்ற தீர்மானத்தோடு ஜெபிக்க ஆரம்பித்தார். இரவு முழுவதும் அதுவரை தான் செய்த பாவங்களை கண்ணீரோடு அறிக்கையிட்டு ஜெபித்தார். இரக்கமுள்ள தேவன் மார்ச் 18ம் தேதி அதிகாலை 4 மணிக்கு நீ சாகாதபடிக்கு நான் உன் பாவங்களை மன்னித்தேன் என்று பேசினார் இரட்சிப்பின் நிச்சயத்தை கொடுத்தார். வாழ்க்கையில் ஆச்சரியமான மாற்றங்கள் உண்டாயின.

அபிஷேகம்

பரிசுத்தமுள்ள வாழ்க்கைக்காக ஒரு நாள் சகோதரர் தன் அறையில் ஜெபித்துக் கொண்டிருந்த பொழுது தேவன் தமது வல்லமையால் சகோதரரை அபிஷேகித்தார். 1974ம் ஆண்டு தஞ்சாவூரில் நடைபெற்ற ஆசீர்வாத முகாமில் பரிசுத்த ஆவியானவரைக் குறித்து தெளிவாக அறிந்து கொண்டு ஜெபித்த பொழுது தேவன் பல மணி நேரம் பரிசுத்த ஆவியால் நிறைந்து பற்பல பாஷைகளை பேசும் கிருபையை கொடுத்தார்.

அழைப்பு

ஆவியானவரால் நிரப்பப்பட்ட பிறகு அழிந்து போகிற ஆத்துமாக்களைக் குறித்த பாரத்தினால் தேவன் நிரப்பினார். பலமணி நேரங்கள் ஆத்துமாக்களுக்காக கதறி ஜெபித்துக் கொண்டிருக்கும் பொழுதுதான் கர்த்தர் தமது கனமான ஊழியத்திற்கு அழைத்தார். தேவனுடைய ஊழியத்தை எப்படி செய்வது என்று திகைத்து நின்ற பொழுது 1975ம் ஆண்டு ஜனவரி மாதத்தில் ஒரு நாள் தேவன் முகமுகமாய் தரிசனமாகி சுமார் அரைமணி நேரம் பேசினார். சகோதரன் கேட்ட அத்தனை கேள்விகளுக்கும் பதில் கொடுத்தார். முடிவாக என் பெலத்தினால் ஊழியம் செய்ய முடியாது, நான் உம்முடைய கையைப் பிடித்துக் கொண்டு நடந்தால் ஒரு வேளை உலக ஆசைகள், பாடுகளைக் கண்டு உம்மை விட்டுவிடக்கூடும். நீர் என் கையைப் பிடித்துக் கொண்டால் ஊழியத்திற்கு வருகிறேன் என்று கண்ணீரோடு வேண்டிக் கொண்டபொழுது ஏசாயா 41:13 ன் படி உன் தேவனாகிய, கர்த்தராகிய நான் உன் வலதுகையை பிடித்து, பயப்படாதே, நான் உனக்கு துணை நிற்கிறேன் என்று சொல்லுகிறேன் என்று வாக்குபண்ணினார்.

தரிசனம்

ஆண்டவரின் அழைப்பிற்கு கீழ்ப்படிந்து ஊழியத்திற்கு அர்ப்பணித்த பொழுது விசுவாச பயிற்சிக்காக வேதாகம கல்லூரியில் சில வருடங்கள் கல்வி கற்க தேவன் அனுமதித்தார். இயேசுவையே முற்றிலும் சார்ந்து நிற்கும் கிருபையை தேவன் இங்குதான் கற்றுக் கொடுத்தார். தெருப்பிரசங்கங்களில் பயன்படுத்தினார். இந்நிலையில் 1977ம் ஆண்டு சேலம் மாவட்டத்திலுள்ள ஏற்காடு மலையிலுள்ள ஆதிவாசி மக்களுக்கு சுவிசேஷத்தை அறிவிக்க ஒரு குழுவாக சென்ற பொழுது தேவன் இவ்வூழியத்தைக் குறித்த தரிசனத்தைக் கொடுத்தார். ஒரு நாள் அதிகாலைநேரம் மலையுச்சியில் தனித்து தேவ சமூகத்தில் காத்திருந்த பொழுது இயேசு விடுவிக்கிறார் என்ற பெயரைக் கர்த்தர் கொடுத்தார்.

வேதாகமக் கல்லூரிப்படிப்பை முழுவதுமாக படித்து முடிக்க ஆண்டவர் அனுமதிக் கொடுக்கவில்லை. முழு நேரமாக ஊழியம் செய்ய வேண்டும் என்ற அழைப்பு வந்த உடன் சென்னையை மையமாக வைத்து ஊழியம் செய்ய பெற்றோர்கள் ஆலோசனை கொடுத்தனர் அப்பொழுது உன் சொந்த கிராமத்திற்கு போ, அங்கிருந்துதான் என் ஊழியத்தை நீ நிறைவேற்ற வேண்டும் என்று ஆவியானவர் திருவுளம்பற்றினார்.

ஆண்டவருடைய வார்த்தைக்கு கீழ்ப்படிந்து சொந்த கிராமமாகிய நாலுமாவடியில் இருந்து கொண்டு அழைக்கிற சபைகளில் சென்று ஊழியம் செய்து வந்தார்கள். மீதியான நேரங்களில் வனாந்திர பகுதிக்கு சென்று பலமணி நேரங்கள் தேவசமூகத்தில் காத்திருப்பார்கள்.

1978ம் ஆண்டு ஜூன் மாதம் 26ம் தேதி திங்கட்கிழமை இந்த வனாந்திரத்தில் ஜெபித்துக் கொண்டிருக்கும்போது கர்த்தர் ஒரு தரிசனத்தைக் கொடுத்தார். ஆண்டவருக்காக செய்து முடிக்க வேண்டிய அநேக ஊழியங்களைக் காண்பித்தார். அன்று காண்பித்த தரிசனங்கள்தான் கடந்த 30 ஆண்டுகளாக இவ்வூழியத்தில் காலா காலங்களில் நிறைவேறி வருகிறது. அழைத்தவர் உண்மையுள்ளவர். இதுவரை நடத்தினார். இனிமேலும் நடத்துவார் என்று விசுவாசிக்கிறோம்.

இடைவிடாமல் ஜெபம் பண்ணுங்கள் 1.தெச. 5:13

"பாடினால், என் இயேசுவுக்காக மட்டுமே பாடுவேன்" - சகோதரி ஹேமா ஜான் அவர்களின் சாட்சி

ஆண்டவராகிய இயேசு கிறிஸ்துவின் நாமத்தினாலே உங்கள் அனைவருக்கும் வாழ்த்துதல்களை கூறிக்கொள்கிறேன். உங்களை சந்திப்பதிலே ஆண்டவர் கொடுத்திருக்கிற இந்த கிருபைக்காகவும் அவருக்கு நன்றி சொல்கிறேன். வேதம் சொல்கிறது "கர்த்தர் நல்லவர், அவர் கிருபை என்றும் உள்ளது". இயேசு கிறிஸ்து யார் என்று அறியாத ஓர் பிராமண குடும்பத்தில் இருந்து 89 ம் ஆண்டு ஆண்டவர் என்னை பிரித்து எடுத்தார். அவருடைய பிள்ளையாக மாற்றிக்கொண்டார். அவருடைய நாமத்திற்கே மகிமை உண்டாகட்டும். 

பிராமண குடும்பத்திலே பிறந்து வைராக்கியமான முறையிலே நான் வளர்க்கப்பட்டாலும் என்னுடைய படிப்பு கல்வி எல்லாம் கிறிஸ்தவ பள்ளிகளிலே தான் இருந்தது. கிறிஸ்தவ பள்ளியில் படித்தாலும் கூட உண்மையான ஆண்டவர் அன்பை அறியாமல் இருந்தேன். குடும்பத்திலே பல போராட்டங்களும் பிரச்சனைகளும் இருந்தது. என்னுடைய தகப்பனாருக்கு சரியான கண் பார்வை இல்லாதபடியினால் குடும்ப பாரத்தை சுமக்க கூடிய பொறுப்பு என் மீது வந்தது. வறுமையை தவிர குடும்பத்திலே மற்றொரு பெரிய பிரச்சனையையும் நான் சந்திக்கவேண்டி இருந்தது.

அது சமாதானமின்மை. சந்தோசமும், சமாதானமும் என் குடும்பத்திலே என் பெற்றோர்களிடத்தில் காணப்படவில்லை. அந்த சூழ்நிலையிலே நான் தேடுகிற நான் விரும்பிகிற சமாதானத்தை யார் கொடுக்க முடியும் என்கிற ஏக்கம் என் உள்ளத்திலே என் சிறு வயது முதலே இருந்து வந்தது. பள்ளிப்படிப்பை முடித்துவிட்டு குடும்ப சூழ்நிலையின் காரணமாக பாரம்பரியமாக பாடல் பாடுகிற கிருபை என் குடும்பத்திற்கு இருந்தபடியினால், என் முன்னோர்கள் அனைவரும் கர்நாடக சங்கீதத்திலே முறையான தேர்ச்சி பெற்றிருந்தபடியினால் எனக்குள்ளும் அந்த தாலந்து பாரம்பரியமாக வந்தது. இந்த தாலந்தை பல திரைப்பட பாடல்களை திரைப்பட குழுக்களில் பாடுவதின் மூலமாக நான் வெளிப்படுத்தி வந்தேன். இதன் மூலமாய் குடும்பத்தின் சூழ்நிலை மாறினாலும், வறுமையின் சூழ்நிலை மாறினாலும் குடும்பத்தில் சமாதானமும் நிம்மதியும் வரவில்லை.

அந்த வேளையிலே 89 ம் ஆண்டு அடையார் கேட் ஹோட்டல் என்று அழைக்கப்படுகிற ஐந்து நட்சத்திர ஹோட்டலிலே அக்கௌண்ட்ஸ் டிபார்ட்மெண்டில் வேலைக்கு சேர்ந்த போது தான் "கல்பனா" "மேரி" என்ற இரண்டு சகோதிரிகளை சந்தித்தேன். என்னோடு பணிபுரிந்து வந்த அந்த சகோதிரிகள் ஆண்டவரை குறித்து எடுத்து சொன்னார்கள். அந்த இரண்டு நண்பர்களை சந்தித்ததன் மூலமாக "என்னுடைய குடும்பத்தில் சமாதானத்தை கொடுக்க வல்லவர் இந்த ஆண்டவர் மட்டுமே என்பதை நான் புரிந்து கொண்டேன். உண்மையான கிறிஸ்தவன், அல்லது கிறிஸ்தவள் கிறிஸ்தவ பெயரை மாத்திரம் வைத்துகொண்டால் போதாது உண்மையாக ஆண்டவரை உள்ளத்தில் ஏற்று கொள்ள வேண்டும் என்பதை நான் புரிந்துகொண்டேன். ஆனாலும் என் இருதயத்திலே முழுமையாக இடம் கொடுக்க முடியவில்லை. அந்த சூழ்நிலையிலே எனக்கென்று ஓர் எதிர் காலத்தை யோசிக்க முடியாத அந்த சூழ்நிலையிலே

என்னுடைய குழுவில் ட்ரம்ஸ் வாசித்த ஜான் என்பவர் என்னை திருமணம் செய்துக்கொள்ள விருப்பம் தெரிவித்தார். ஆனால் என்னில் திருமணமே செய்துகொள்ள விருப்பம் இல்லாதிருந்தது. என்னுடைய நண்பர்கள் சொன்னதன் காரணமாக 89ம் ஆண்டு அக்டோபர் மாதம் இயேசு அழைக்கிறார் ஜெப கோபுரத்திற்கு சென்று ஜெபித்தேன். அப்போது அங்கிருந்த தேவ ஊழியர் "ராஜன் ஜான்" என்பவர் ஜெபத்தின் மூலமாக நான்கு காரியங்களை இயேசு கிறிஸ்து வெளிப்படுத்தினார். "உன் குடும்பத்திலிருந்து எனக்காக உன்னை பிரித்து எடுத்தேன்" "நீ என்னுடைய ஊழியத்தை செய்வாய்" உலகத்திற்காய், பணத்திற்காய், புகழுக்காய் நீ பாடி கொண்டிருக்கிறாய். ஆனால் என்னுடைய நாம மகிமைக்கென்று இந்த உலகம் முழுவதும் உன்னை அழைத்து செல்வேன் என்று வாக்கு பண்ணினார். "நீ எனக்கார் ஒரு அடி எடுத்துவைக்கும் போது நான் உனக்காய் யாவையும் செய்து முடிப்பேன்" என்று சொல்லும்போது என்னுடைய குடும்பத்தில் சமாதானத்தை கொடுக்க வல்லவர் அந்த ஆண்டவர் மட்டும்தான் என்று புரிந்துகொண்டேன். அந்த ஜெபத்தின் முடிவிலே ஆண்டவராகிய இயேசு கிறிஸ்துவை என் சொந்த இரட்சகராக ஏற்று கொண்டேன்.

24 வருடங்களாக நான் தேடி கொண்டிருந்த சமாதானமும் சந்தோசமும் அந்த ஜெபநேரத்திலே என் உள்ளத்திலே வந்தது. பலவித எதிர்ப்புகளின் மத்தியில் "ஜான்" அவர்களை 1990 ஆகஸ்ட் 24ம் நாள் திருமணம் செய்துகொண்டேன். திருமணத்திற்கு முன் பல சினிமா பாடல்கள் பாடிகொண்டிருத நான் "பாடினால் இந்த ஆண்டவருக்கு மட்டும் தான் பாடுவேன்" என்று வைராக்கியமாய் ஒரு முடிவு எடுத்து என் தாலந்துகளையும், என் வாழ்க்கையையும் கர்த்தருடைய கரத்தில் ஒப்புகொடுத்தேன். இந்த நாள் வரைக்கும் ஆண்டவரின் மகிமைக்காக பல ஆயிரம் பாடல்கள் பாட ஆண்டவர் உதவி செய்தார். 24 வருடமாக என் குடும்பத்திலே காணாத சமாதானத்தை தேவன் கொடுத்தார். கர்த்தரின் நாமத்திற்கு மகிமையுண்டாவதாக. பல ஒளிநாடக்களிலே பாடும்படியாக தேவன் வாய்ப்பு கொடுத்தார். குறிப்பாக சகோதரர் T . Agustin என்பவர் அதிகமாய் கிறிஸ்தவ பாடல்கள் பாடும்படியாக ஊக்கப்படுத்தினார்.

இயேசு அழைக்கிறார், சகோதரர் சாம் ஜெபத்துரை, சகோதரர் மோகன் சி லாசரஸ் என்று பெரிய ஊழியக்காரர்கள் ஒலிநாடாக்களில் பாடும்படியாக தேவன் எனக்கு கிருபை தந்தார். இந்த ஆண்டவர் ஒருவரே நமக்காக, நம் பாவங்களுக்காக, தன்னுடைய ஜீவனை கொடுத்தவர். என் குடும்பத்தின் சமாதானத்திற்கென்று பல இடங்களுக்கு சென்று, பல விக்கிரங்களை நான் தொழுது வந்திருக்கிறேன். ஆனால் ஒரு தெய்வத்தினாலும் என் குடும்பத்திற்கு சமாதானத்தை கொடுக்க முடியவில்லை. இந்த ஒரு ஆண்டவர் தான் எனக்காக யாவையும் செய்து முடித்தவர். எனக்காக தன ஜீவனை கொடுத்தவர்.

உங்கள் வாழ்க்கையிலும் கூட, உங்கள் பிரச்சனை எதுவாக இருந்தாலும் இந்த ஆண்டவர் ஒருவரே நமக்காய் ஜீவனை கொடுத்தவர், உங்களுக்காக மாட்டு தொழுவத்திலே பிறந்தவர் இந்த ஒரு தேவன் தான் என்பதை நீங்கள் புரிந்து அதை உங்கள் உள்ளத்திலே நீங்கள் அறிந்து அதை அறிக்கை செய்வீர்களேயானால் உங்கள் பாவமான வாழ்க்கையை விட்டு நீங்கள் திரும்புவீர்கலேயானால் உங்களுடைய உள்ளத்திலே இந்த ஆண்டவரால் வரமுடியும். என்னுடைய வாழ்கையில் செய்ததுபோல பல அற்புதங்கள் உங்கள் வாழ்க்கையிலும் நடைபெறும். ஆமென்.

தொகுத்தது
தமிழ்நாடு கிறிஸ்தவ ஊழியங்கள்

ஆதியில் கொண்ட அன்பு

நீ இன்ன நிலைமையிலிருந்து விழுந்தாயென்பதை நினைத்து, மனந்திரும்பி, ஆதியில் செய்த கிரியைகளைச் செய்வாயாக. - வெளிப்படுத்தின விசேஷம் - 2.5.

புதிதாகத் திருமணம் செய்து கொண்ட தம்பதியினர் ஆரம்பநாட்களில் ஒருவரையொருவர் எவ்வாறு பிரியப்படுத்தலாம் என்று கவனமாக இருப்பார்கள். எது பிடிக்கும், எது பிடிக்காது என்பதை அறிந்து கொள்வதில் ஆர்வம் காட்டுவர்.  துணையின் செயல்களை பாராட்டுவதிலும்,  சுவையான உணவளிப்பதிலும், எதிர்பாராத அன்பளிப்புகளைக் கொடுப்பதிலும் தீவிரம் காட்டுவர்கள். சிரத்தை எடுப்பார்கள்.  ஆனால் சில ஆண்டுகள் கழித்து பார்த்தால் பெரும்பாலான தம்பதியினரிடையே இந்த உணர்வு தன்மைகள் மறைந்து போய்விடுகிறது.  குடும்பமாக இணைந்து வாழ்ந்தாலும்,  சரியாக அவரவருடைய பொறுப்புகளை நிறைவேற்றினாலும் ஒருவரைக் குறித்து மற்றவருக்கு அலட்சிய மனப்பான்மை ஏற்பட்டுவிடுகிறது.

அதேப்போல ஒரு அலுவலகத்தில் வேலையில் சேரும்போது முதல் நாளில் சரியான நேரத்திறகு சென்று விடுகிறோம். கடினமாக உழைக்கிறோம். மேலதிகாரியிடம் மிகவும்  மரியாதையாக நடந்து கொள்கிறோம். அவருக்கு பிடித்ததையும், பிடிக்காததையும் மிகவும் வரைவாகத் தெரிந்து கொள்கிறோம்.  ஆனால் 3 அல்லது 5 ஆண்டுகள் கழித்து நிலமை என்ன ஆகிறது?  காலதாமதம, பொறுப்பின்மை போன்ற அலட்சியம் நம்மில் அநேகருக்கு ஏற்பட்டு விடுகிறதல்லவா?

இப்போது நாம் நம்முடைய பாய்ண்டுக்கு வருவோம்.  ஆண்டவரோடுள்ள நமது உறவு எப்படிக் காணப்படுகிறது? இரட்சிக்கப்பட்ட அந்த நாளை கொஞ்சம் நினைத்துப் பாருங்கள். அபிசேஷகம் பெற்ற அந்த நிமிடங்களை சற்று எண்ணிப் பாருங்கள் அன்று மற்ற எல்லாவற்றையும் விட அவரை பிரியப்படுத்தவே ஆசைப்பட்டோம். வாழ்வின் சிறு சிறு காரியங்களுக்கு கூட அவருடைய ஆலோசனையை நாடினோம்.  இதயத்தின் ஆழத்திலுள்ள எண்ணங்களையும் விருப்பங்களையும் கூட அவரோடு பகிர்ந்து கொண்டோம்.  இன்று தேவனோடுள்ள உங்களுடைய உறவு எப்படியிருக்கிறது. இன்னும் அனலாகியுள்ளதா?  அல்லது அனலுமின்றி, குளிருமின்றி வெதுவெதுப்பாய்க் காணப்படுகிறதா?


வேதத்தில் இதே நிலமையிலுள்ள எபேசு என்ற சபைக்கு தேவன் கூறும் ஆலோசனை என்ன தெரியுமா? மேலே (துவக்கத்தில்) குறிப்பிட்ட வசனத்தை வாசித்துப் பாருங்கள்.  ஆம் முதலவதாக 'நினையுங்கள்' ஆதியில் தேவன் மேல் கொண்ட அன்பை நினையுங்கள்.  தற்போதுள்ள நிலையை அதோடு ஒப்பிட்டு பாருங்கள்.  அடுத்ததாக 'மனந்திரும்புங்கள்'. முதலாவது உங்களை கர்த்தருடைய பாதத்தில் தாழ்த்தி அவரிடம் உங்கள் உள்ளத்தை ஊற்றி ஜெபியுங்கள். எந்த காரியம் என்னை ஆவரை விட்டு விலக செய்தது என்று சிந்தித்து மனம் மாறுங்கள். ஆதியில் கொண்ட அன்பை பெற தேவன் நிச்சயம் உதவுவார்.

இயேசுக் கிறிஸ்து இப்படி நடந்து கொண்டாரா????

இயேசுக் கிறிஸ்துவில் ஒன்று சேர்க்கப்பட்ட நாம் அவர் பிள்ளைகளாய் இருக்கிறோம். அவருடைய நாமத்தினால் நாம் எதைக்கேட்டாலும் அவர் எமக்கு தருகிறவராய் இருக்கிறார். எனினும் விசுவாசத்தின் ஆழத்தையும், நாம் அவரில் வைத்திருக்கும் அன்பையும் தேவன் ஒருவேளை அறிய முற்படும் போது என்ன நிகழும்? பரிசுத்த வேதாகமத்தில் நடந்த சம்பவம் ஒன்றை பார்ப்போம். 

இயேசு ஒரு நாள்  தீரு, சீதோன் பட்டணங்களின் திசைகளுக்குப் போய்க்கொண்டிருந்தார். அப்பொழுது, அந்தத் திசைகளில் குடியிருக்கிற கானானிய ஸ்திரீ ஒருத்தி அவரிடத்தில் வந்து: "ஆண்டவரே, தாவீதின் குமாரனே, எனக்கு இரங்கும், என் மகள் பிசாசினால் கொடிய வேதனைப்படுகிறாள்" என்று சொல்லிக் கூப்பிட்டாள். இப்பொழுது இயேசுவின் வழமையின் படி அவர் அவளது மகளை சுகப்படுத்தியிருக்க வேண்டும். எனினும் இயேசு அந்த இடத்தில் அவளுக்கு எந்த வார்த்தையும் சொல்லவில்லை. இது இயேசுவை நம்பி வந்த அவளுக்கு ஒரு ஏமாற்றமாகவே இருந்திருக்கும். அதோடு மட்டும் இந்த ஏமாற்றம் முடியவில்லை, தொடர்ந்து என்ன நடக்கிறதென்பதை கவனியுங்கள். அப்பொழுது அவருடைய சீஷர்கள் வந்து: "இவள் நம்மைப் பின் தொடர்ந்து கூப்பிடுகிறாளே, இவளை அனுப்பிவிடும்" என்று அவரை வேண்டிக்கொண்டார்கள். அதாவது இயேசு பேசாமலிருந்தும் அவள் அவர்களை விடாமல் தொடர்ந்து செல்கிறாள். இதனால் சீஷர்கள் இயேசுவிடம் அவளை அனுப்பிவிடும் படி கேட்கிறார்கள். அதற்கு இயேசு அளித்த பதில் "காணாமற்போன ஆடுகளாகிய இஸ்ரவேல் வீட்டாரிடத்திற்கு அனுப்பப்பட்டேனேயன்றி, மற்றப்படியல்ல". இவ்வாறு இயேசு சொன்னாலும் அவள் அவரை விடவில்லை அவர் பாதத்தில் விழுந்து அவரை பணிந்து கொள்கிறாள். அதற்கு இயேசு சொல்கிறார் "பிள்ளைகளின் அப்பத்தை எடுத்து, நாய்க்குட்டிகளுக்குப் போடுகிறது நல்லதல்ல". இந்த வார்த்தையானது அவளுக்கு ஆறுதலை அல்ல, அவமானத்தையே அவளுக்கு கொடுத்திருக்கும். எனினும் அவள் இயேசுவை தவிர தனது மகளுக்கு வேற எவராலும் விடுதலை தரமுடியாது என்பதை அறிந்திருந்தாள். அது அவள் இயேசுவுக்கு அளித்த பதில் மூலம் நமக்கு காட்டுகிறது. "மெய்தான் ஆண்டவரே, ஆகிலும் நாய்க்குட்டிகள் தங்கள் எஜமான்களின் மேஜையிலிருந்து விழுகிற துணிக்கைகளைத் தின்னுமே" என்று அவள் சொன்னாள். தன்னை ஒரு நாய் என்றே அவள் ஏற்றுக்கொள்கிறாள். இதற்குப் பின்பும் இயேசு அவளை சோதிக்க விரும்பவில்லை. இயேசு அவளுக்குப் பிரதியுத்தரமாக: "ஸ்திரீயே, உன் விசுவாசம் பெரிது; நீ விரும்புகிறபடி உனக்கு ஆகக்கடவது" என்றார். அந்நேரமே அவள் மகள் ஆரோக்கியமானாள். (மத்தேயு 15:21-28)

இதே போல தான் யோபுவுக்கும் சோதனை உண்டானது எனினும் அவன் ஒரு போதும் கடவுளை தூசிக்கவில்லை. நாம் சோதிக்கப்படும் போது பின்வாங்கிப்போகிறோம், அல்லது ஒரு அவமானத்தை இயேசுவின் நாமத்தில் ஏற்க மறுக்கிறோம், அல்லது நாம் அவரிடம் வேண்டிக்கொள்வது கிடைக்கவில்லையே என்று பொறுமையிழக்கிறோம். இந்த சம்பவத்தில் அவள் கோபப்பட்டிருந்தால் அவள் அவளது மகளுக்கு சுகத்தை பெற்றிருக்க முடியாது, விசுவாசம் பெரிது என்கின்ற நற்சான்றுதலையும் இயேசுவிடம் இருந்து பெற்றிருக்க முடியாது. ஆகவே நாமும் பொறுமையாய் இருப்போம், எதை எவ்வேளையில் நமக்கு செய்ய வேண்டும் என்று கர்த்தருக்கு தெரியும் (மத்தேயு 6:8). அவசரப்பட்டு வீணராகிவிடாதபடி பொறுமையுடன் இருந்து ஆசீர்வாதத்தை பெற்றுக்கொள்வோம்.  

இது சகோ.ஸ்டான்லி(இந்திய தேவ மனுஷன்) அவர்களின் பிரசங்கத்தின் ஒரு பகுதி..
 
Copyright © 2012-2015. CEYLON CHRISTIAN (TAMIL) - All Rights Reserved